娛樂新聞

■ 羅霖與吳岱融出席火鍋店開幕活動。

羅霖忙拍劇瘦8磅


[2017-05-18]
爆有人見到好肉痛

羅霖與吳岱融昨日到牛頭角出席火鍋店開幕活動。穿上喱士連身短裙現身的羅霖,近日因忙於拍劇集《宮心計2深宮計》瘦了8磅,現有106至108磅,上圍都因此而細了,件衫亦有點鬆。

羅霖表示完成香港戲份後就會去橫店拍攝三個星期,知道當地氣溫高達三十幾度,由於是第一次去橫店,所以近日已周圍問人防中暑方法,女仔的戲服露出心口冇咁熱,男藝員就慘些。

她又謂:「今次拍劇試過開八日通宵,估不到自己可以頂得住,朋友還讚我個樣冇捱殘,但媽咪就擔心我,因為每次開工都會帶好多嘢食,更有個花名叫『士多霖』,但食極都唔肥,故打算拍完劇同三個仔去熱帶地方旅行,會穿泳衣,但不會拍寫真,只會自己睇。」問到男友可有心痛?羅霖笑說:「邊個男友?父母見我咁瘦都好肉痛,媽咪覺得我行屍走肉咁。」

她又預告拍完劇後會處理人生大事:「呢5年為咗3個仔日日工作,又冇時間打理公司,忙完呢輪之後會考慮係唔係認真去發展,(好消息定壞消息?)一定唔會係壞消息,我會認真篩選,為自己將來着想,(之前同你影婚紗相的內地富二代機會大唔大?)機會都大。」

說到近日洪永城與唐詩詠被指不婚即分,羅霖自言從未發生過這些事,每次都是和平分手,可以做回朋友,除了前夫。

吳岱融無興趣搞生意

吳岱融表示自己無份投資,亦對搞生意興趣不大,他說:「我係『數字白痴』,又耳仔軟,唔適合搞生意,太太(鍾淑慧)同我一樣係數學白痴,啲數都係搵朋友睇,數口唔精可能做人會開心啲。」稍後他將會拍攝邵氏網劇《飛虎極戰》,劇中飾演高級警司,龔慈恩飾演他的太太,而伍詠薇就為他生了個仔,亦會有些打戲,但就不用着全副武裝上陣。


上题 : 衛詩雅被「神醫母」搽油止咳

下题 : 阿Sa與惠英紅「較量」演技