娛樂新聞


望比肩蘇州同鄉劉嘉玲 朱晨麗擇偶不向錢看


[2018-05-08] - 971人點閱
朱晨麗在劇集《棟仁的時光》中,介入唐詩詠同袁偉豪的感情,朱晨麗大呼好難演,只因現實中沒有這個經驗。去年在萬千星輝頒獎典禮拿下「最佳女配角」,接着又將在電影版《倚天屠龍記》演「周芷若」,朱晨麗事業一帆風順,她視蘇州同鄉劉嘉玲為奮鬥目標。30歲的她身邊不乏追求者,更坦言男方唔需要有錢,自己只求一段陪伴在側的愛情。

撰文、攝影:植毅儀  化妝:Henry Li
  髮型:Steve Shek 服裝:mino maestrelli

挾四料港姐冠軍名銜闖娛樂圈的朱晨麗,從小練得一身好「舞功」,曾是香港芭蕾舞團成員,十歲開始學芭蕾舞,跳拉丁舞、中國舞,一路變成一個專業的舞蹈員。朱晨麗在《棟仁的時光》演鋼管舞女「莫熙蓮」,最初知道要演,最擔心都是性感一環,更笑言要瞞着媽媽去學鋼管舞。

「我父母都是好保守的人,之前演港姐穿泳裝,父母都有微言,所以今次演呢個角色,除咗跳舞時啲舞衣性感外,平日都打扮得好風騷。初初監製找我演,我仲問監製有冇搵錯人,係咪真係想搵我演。之後公司搵老師教我跳鋼管舞,挫敗連連,呢種舞同我跳開的芭蕾舞好大分別,最基本的動作都做唔到,老師都畀好多耐性我,話我知除咗操練,返到屋企仲要操腹肌、手臂,真係好辛苦。大髀內則仲不停受傷,手瘀晒起晒繭同水泡,練咗兩星期先上到管。同埋在工廈拍跳舞,好多臨時演員攞住自己手機影相,好尷尬。」

拍《特技人》體力透支

為了演好角色,朱晨麗堅持訓練,唔肯用替身,現在出來效果獲得不少掌聲,也因為堅持,令朱晨麗一步步走向第二女主角。早前播出《平安谷之詭谷傳說》,女主角蘇玉華在訪問中,曾大讚朱晨麗有演技,拍吵架戲有火花。

「入行7年,我好努力去做好自己,我廣東話不標準,就把劇本寫滿注音,某些詞語不明白,就向身邊人請教。入行初期,拍《名媛望族》,嗰時啱啱選完入行,真係乜都唔識,松哥(劉松仁)教咗我好多嘢。去年拍《平安谷之詭谷傳說》,阿蘇(蘇玉華)同劉老師(劉江)真係好好演技,平時私底下阿蘇啲霸氣,令你好驚,但埋到嚟,阿蘇成個小朋友咁,會同你嘻嘻哈哈、玩好後生的玩笑,講笑又唔mind,可能無咁驚,做對手戲嗰陣就得心應手,大家睇起來就好舒服。剛拍完的《特技人》,又是另一個大挑戰,當中好多飛車、撞車、爆炸,我沒有用替身,試過腳趾受傷,腫咗兩個月。又試過連續拍三十幾個鐘,體力透支,暈咗,送咗去醫院。」
對感情一心一意

本身是獨生女,10歲已離鄉別井到外地讀書,從小與家人相處時間不多,剛滿30歲的朱晨麗現在很珍惜同家人相處時間。入行初期同男神馬國明傳緋聞,去年又與上位男星何廣沛配成一對,但原來一切都是幻象。朱晨麗自爆之前一段感情,圈外男友嫌佢拍劇時間唔穩定,繼而提出分手,令朱晨麗以淚洗面。

「我10歲已離鄉別井,與家人相處時間不多,世界上沒有叮噹嗰個時空穿梭機,很多時光過了就冇得返轉頭。就算現在發夢,也會夢到小時候家人同我講故事的情境,在夢中醒來還是keep住好sad的情緒。自己年紀也不少,經歷過身邊人過身,所以更要珍惜每一秒。如果我跟劇中主角一樣,只得30分鐘人生,我會攬住父母一齊過。父母在蘇州有工作,現在我一有時間就會回蘇州,就算要坐成五、六個鐘車,返到去只是住一晚,我都會返去探他們。好耐之前我拍拖,對方是圈外人,我當時入咗院,sent短訊畀佢希望佢來醫院陪我,點知對方話唔方便過來,當時令我感到好失落,睇清楚一個人。其實我拍拖要求好簡單,我個人好一心一意的,又好追求浪漫,你閒時送朵花畀我,又或是我病時你陪伴在側,我已經ok。我唔需要咩金融財俊,我只求一段陪伴在側的愛情。入行後都有拍拖,就更加睇清楚自己需要什麼,另一半有冇錢都冇所謂。我試過男朋友話我咁忙,不如拍完劇先搵我啦。拍一套劇三、四個月,咁你即是同我分手啦,我都唔開心咗好耐,喊咗好耐。」


上题 : 城城帶「女兒」宣傳

下题 : Twins愛成都美食