娛樂新聞

■ 劉青雲(右)、林嘉欣(中)和張家輝為主演新片落力宣傳。

靚靚為青雲甘願客串演出 家輝嫌出埠拍戲住酒店煩


[2019-01-31] - 2818人點閱
麥兆輝執導、莊文強和黃斌監製的電影《廉政風雲 煙幕》前晚假九展舉行首映禮,一眾演員劉青雲、張家輝、林嘉欣、方中信、 袁詠儀(靚靚)、吳岱融、湯怡亦有出席。談到家輝和嘉欣赴澳洲取景一個月,嘉欣直言好開心,不過家輝卻反而羨慕青雲在港開工,他與青雲都覺得出埠拍戲住酒店是麻煩事,因要適應每間酒店房的設計,家輝更自爆試過唔識開浴室水掣。

台上並進行醒獅點睛儀式,當晚李克勤亦有到場獻唱電影主題曲。抱病上陣的他表示因早前仍開唔到聲,為了唱這首歌擔心了三日。當晚黃子華、關智斌 、鍾舒漫及湯怡舊愛洪卓立等亦有出席捧場。

客串演出的靚靚,在台上表示除了劇本打動到她接拍外,還加上可再次跟青雲合作,因已廿六年沒跟他合作,想看看他變成怎樣,但他仍然是不愛說話:「我哋合作拍過咁多部電影,私底下講嘢唔夠十句,嗰十句仲係『食咗飯未呀?』、『食咗』。」

靚靚讚青雲好有男人味

之後靚靚接受訪問,她不諱言若不是主要的對手戲是與青雲演,她絕不會客串,恩師陳可辛、曾志偉和爾冬陞的電影除外,而麥兆輝是好的「表哥」,但大家並不熟絡,更已很久沒見,所以對方找她客串時,首先問可有發揮,知道角色得意,又是跟青雲合作才答應。相隔廿六年再與青雲合作,靚靚表示感覺恍如昨天,大家好像仍很年輕:「青雲雖然都係唔鍾意講說話,但變得更成熟穩重,好有男人味,今次客串唔夠喉,下次再有多啲對手戲就好,好期待再同青雲演情侶或夫妻。」

青雲、家輝和林嘉欣一起接受訪問,問到家輝和嘉欣赴澳洲取景一個月是否拍得很開心?嘉欣直言好開心,不過家輝卻反而羨慕青雲在港開工:「我都羨慕佢收工可以返屋企,你估我喺出面住一個月好好玩呀?當然係瞓返自己張床好啲啦。」家輝自爆在雪山拍滑雪場面,因為不懂滑雪而經常跌倒,連褲子拉鏈也壞了,更連手機遺失在雪山上也不知,幸好被人發現送回他下榻的酒店,他笑說:「埋喺雪下都被發現,真係無奇不有。」嘉欣表示有多場動作戲,她要追打家輝,不過他也很樂意被她施虐。

湯怡被青雲氣場嚇倒

提到麥兆輝計劃開拍續集,他們均表示若導演預他們,時間又許可會再演出。問到青雲若拍續集,會否要求要出埠拍攝?青雲說:「出埠住酒店係麻煩事,好似今次返內地巡迴宣傳,每日住唔同酒店,要適應每間房間啲燈掣同水掣。」家輝也有同感,他笑說:「發覺啲酒店新設計令你用唔到就開心,試過唔識開浴室水掣,沖唔到涼。」青雲又透露在陌生酒店有時會失眠,只好搞電燈掣。嘉欣就沒這問題,因為她一戴上眼罩便能入睡。家輝即取笑嘉欣說:「好似賽馬一樣?」

另外,家輝的女兒張童日前13歲生日,問到當日如何慶祝?他表示都是食飯和切蛋糕。

湯怡在片中與青雲同一組,她坦言起初是很怕青雲,因覺得他很酷,第一次跟他做對手戲時更驚得對不到戲,青雲就主動跟她說:「你放慢啲,唔使咁緊張,我唔會食咗人嘅,我就稍為緩和咗啲,試戲還好啲,但一拍攝就已經窒咗,(青雲氣場太勁?)非常犀利,唔敢NG太多,自己都入行十年,唔可以驚咁多。」為了克服恐懼,她就主動同青雲交談,傾下大家喜歡的跑步運動,而他亦有分享自己的拍攝經歷,又說她才剛起步有排捱,叫她慢慢捱,他在我這年紀時是工作最多的。


上题 : 黃宗澤吳卓羲稱未聞林峯婚訊

下题 : 產後現身撐老公 亞男縮肚 祖藍再三暗示追多個