娛樂新聞

■ 郭晉安和譚俊彥合作愉快

譚凱琪餵人奶升Cup 譚俊彥向郭晉安 學做好老公


[2021-02-10] - 164人點閱
郭晉安(安仔)、譚俊彥(Shaun)、譚凱琪、王君馨、湯洛雯、江欣燕及姜大衛等,昨日到電視城出席新劇《失憶24小時》宣傳活動,眾人以劇中造型現身介紹角色,可能劇集是去年拍攝,不少演員竟忘記了自己的角色及性格。

安仔出名是好老公,譚俊彥坦言要向安仔好好學習。

而譚凱琪產後復工,身材明顯豐滿了。

首次合作拍劇的安仔及譚俊彥,被問到劇集將於大年初四播映,對收視可有期望?譚俊彥說:「我覺得觀眾鍾意睇啲開心嘢,呢套劇最特別係開心又講感情,呢樣係疫情期間大家唔記得咗嘅嘢,呢套劇畀返好多友情同親情大家。」

安仔亦表示對收視好有信心,而信心是來自拍攝時的努力,他笑說:「我同阿Shaun拍劇嘅時候要鬥智鬥力,現實生活中我哋都同樣要鬥,要好熟劇本至可以駕馭到,因為套劇節奏好明快,要好清楚劇本,我哋基本上係唔會帶劇本入廠,一見面就唔會打招呼直接講對白,畀導演好大壓力,覺得現實同戲中都係嗰個人。」

安仔笑言二人愈拍愈夾,到後期已經傾家事而不是傾劇本,他笑說:「好開心可以認識阿Shaun,因為我對佢Daddy好好奇。」

阿Shaun就稱要學安仔做個好老公。疫情關係不拜年談到農曆新年,安仔表示因疫情關係新年都會盡量留在家中,相信一次半次唔去同長輩拜年,他們都會明白。

阿Shaun就表示會為家人下廚,除了會包蛋餃,今年更想挑戰獅子頭,因為家人想食。

安仔笑言下次開飲食節目,阿Shaun負責煮,他可以做「執碼」。

譚凱琪去年10月誕下女兒Gabri後,昨日首度公開現身,做了媽咪身材依舊纖瘦的她,上圍明顯升Cup。

譚凱琪表示《失》劇是她產前最後一套劇,現在產後復工首個工作亦是宣傳該劇,特別有感覺。

她又透露稍後將為另一套新劇《十八年後的終極告白2.0》開工,目標希望能夠工作和家庭兩邊兼顧。

問到疫情期間開工,家中還有初生女兒,老公可有微言?她說:「老公好尊重同支持我嘅決定,只係叮囑我小心,而劇中對手主要都係做咗爸爸嘅譚俊彥、陳山聰,相信都安全的。」

她透露開工期間媽咪會幫手湊BB,老公收工也會回家幫手,不過她擔心BB開始認人,她笑說:「我一返屋企就會將所有時間全畀佢,而且佢係食我奶長大,佢好需要我。」

正餵哺母乳的她坦言正為泵人奶想辦法,她指已看過劇本,都有不少外景,幸地點不算偏僻,只好盡量做,知道有些雪奶袋,若她泵完奶而老公又得閒,便叫他幫手將奶運返屋企,自己亦會隨身帶備消毒用品。

說到她上圍豐滿不少?譚凱琪笑指沒有真正量度過,但現在有時着衫感覺不同了,亦不敢着緊身衫,因為很尷尬。

此外,身穿低胸睡衣現身的江欣燕,令不少人嘩然,君馨笑問江欣燕:「點解我着冇呢個效果?」江欣燕笑說:「因為我食得多砵仔糕。」場面搞笑。


上题 : 何婉盈睽闊近30年再出歌

下题 : 疫情導致停工一年 焦媛盼上半年能演出