香港新聞


【特稿】議員多姿彩 歡樂度佳節


[2018-12-24] - 6895人點閱
今日係一年一度嘅聖誕節,香港到處充滿濃濃嘅節日氣氛。一眾立法會議員除咗祝賀各位市民聖誕快樂外,亦都以唔同方式慶祝,有人裝飾辦公室為同事製造驚喜、有人介紹正宗聖誕火雞、有人教大家環保包禮物等,真係同節日一樣多姿多彩。

謝偉銓驚喜裝飾辦公室

「如果工作環境可以充滿節日氣氛就好啦!」相信呢個願望都係唔少打工仔嘅心聲,而立法會建築、測量、都市規劃及園境界議員謝偉銓(Tony)就化身成神秘聖誕老人,等議員辦公室嘅同事放工走晒之後,自己就一個人靜靜雞咁裝飾間辦公室。其他同事第二朝返工見到辦公室煥然一新,都覺得好驚喜,有個咁有心、咁有創意嘅老細,真係唔話得呀!

葉太介紹火雞 陳克勤教包禮

好多人都會喺聖誕節出街食大餐,新民黨立法會議員葉劉淑儀就特登去到美利樓,為大家介紹正宗聖誕火雞,希望大家能感受到這道菜帶來的暖意。

葉太仲分享自己喺外國留學嘅經歷,話當時學校會為一眾「無家可歸」嘅留學生預備火雞餐,令佢十分難忘。所以,每逢過聖誕,葉太都一定會買隻正宗聖誕火雞,同新民黨嘅大家一齊分享。

聖誕節唔少得嘅當然就係交換禮物,民建聯立法會議員陳克勤就親自拍片,教大家點樣用布嚟包裝禮物,除咗令份禮物睇落更特別之外,亦都比起用花紙包裝更為環保。

不知不覺又到年尾,辛苦咗一整年都想喺假期到唞一唞。民建聯立法會議員鄭泳舜祝大家聖誕快樂,同時希望香港市民有更好嘅生活環境。立法會九龍西議員陳凱欣就希望大家節日假期好好休息,再為未來努力,一齊迎接更豐盛嘅2019。


上题 : 聖誕輪急症 4公院等逾8小時

下题 : 區區大事:梁美芬促做好配套解旅巴阻街